វីរៈតារា បដិសេធវះកាត់កែសម្ផស្ស និងប្រាប់ពីអាថ៌កំបាំងថែរក្សាសម្រស់

2018-03-29 00:00:00
ចំនួនមតិ 0 | ចំនួនចែករំលែក 0

កាលពីល្ងាចម្សិលមិញនេះក្នុងកម្មវិធី "យុទ្ធនាការក្រមា១០០០ម៉ែត្រ បំបែកឯតទគ្គកម្មក្រមាវែងជាងគេលើពិភពលោក" នៅវាលព្រះមេរុ ដែលមានការអញ្ជើញចូលរួមពីតារាសម្ដែងជើងចាស់ លោកស្រី វីរៈតារា។ អ្នកស្រីមានឈ្មោះបោះសំឡេងតាំងពីទសវត្សរ៍ ទី ៦០ដោយសារមានទេពកោសល្យ ហើយបានសម្ដែងជាតួឯកស្រីក្នុងរឿងអនអើយស្រីអន រិទ្ធិសែននាងកង្រី និង សព្វសិទ្ធ។

មកដល់បច្ចុប្បន្ននេះ អ្នកស្រីមានអាយុ ៧១ឆ្នាំ តែសម្រស់ក្មេងជាងវ័យនិងសុខភាពរឹងមាំអ្នកស្រី នៅតែធ្វើឲ្យទស្សនិកជនមានការស្ងើចសរសើរ។ នៅក្នុងបទសម្ភាសន៍អ្នកស្រីបានទម្លាយពីវិធីថែរក្សាសម្រស់និងសុខភាពយ៉ាងនេះថា៖" តាមពិតទៅខ្ញុំ អត់មានតិចនិកអីពិសេសនោះទេក្មួយ។ ខ្ញុំគ្រាន់តែចំណាយពេល ១ ម៉ោងរៀងរាល់ព្រឹកដើរលើម៉ាស៊ីន ដើម្បីឲ្យសរសៃឈាមដើរស្រួល សម្រាកគ្រប់គ្រាន់និងញ៉ាំអាហារមានវីតាមីន។" អ្នកស្រី បន្ថែមថា អាហារដែលអ្នកស្រីចូលចិត្តខ្លាំងជាងគេ គឺសម្លកកូរបន្លែគ្រប់មុខ។

អ្នកស្រីបានឆ្លើយបដិសេធសំនួរទាក់ទងនិងការវះកាត់កែសម្ផស្សថា៖ " អត់ទេក្មួយ ខ្ញុំមិនដែលធ្វើអ្វីទេ ខ្ញុំបណ្ដោយតាមធម្មជាតិទាំងអស់ គ្រាន់តែលាបមុខមាត់ប្រើម្សៅក្រែមធម្មតាពេលត្រូវចូលរួមកម្មវិធីផ្សេងៗ។ "

ចុចអាន៖ផ្ទៃមុខសរលោងស្អាតដូចកូនក្មេង ដោយគ្រាន់តែអនុវត្ត ៣ វិធីងាយៗនេះ

អត្ថបទ៖ Pencharm