អ្នកមានគម្រោងបើកហាងកាហ្វេ ត្រូវដឹងពីហានិភ័យទាំងនេះសិន

2018-06-14 00:45:45
ចំនួនមតិ 0 | ចំនួនចែករំលែក 0

សព្វថ្ងៃនេះហាងកាហ្វេ មានការរីកដុះដាលជាច្រើនកន្លែងមិនគួរឲ្យជឿ មិនថាជាហាងនៅក្នុងស្រុក ហាងដែលមានឈ្មោះល្បីមកពីបរទេស ឬជាអាជីវកម្មលក្ខណៈគ្រួសារនោះទេ។ ភាគច្រើនវាគឺជាក្តីស្រមៃរបស់មនុស្សម្នាក់ៗ ដែលចង់ក្លាយជាម្ចាស់ហាងកាហ្វេ ព្រោះកាហ្វេមានអ្នកចូលចិត្តផឹកច្រើនជារៀងរាល់ថ្ងៃ។ យ៉ាងណាមិញ សម្រាប់អ្នកដែលមានគម្រោង ចង់បើកហាងកាហ្វេ ទោះបីជាបានត្រៀមខ្លួនរួចរាល់ហើយក៏ដោយ អ្នកគួរដឹងពីហានិភ័យទាំងនេះសិន ដើម្បីកុំឲ្យខកចិត្តខ្លាំង នៅពេលដែលអ្វីៗមិនដូចការរំពឹងទុក។

១. ជីវិតអ្នកនឹងផ្លាស់ប្តូរទាំងស្រុង

សម្រាប់អ្នកធ្វើការគឺមានពេលវេលានិងថ្ងៃឈប់សម្រាក ប៉ុន្តែបើអ្នកក្លាយជាម្ចាស់ហាងកាហ្វេវិញ អ្នកត្រូវរវល់ពេញមួយថ្ងៃ សូម្បីតែពេលបិទហាង ក៏ត្រូវនៅមានការងារជាច្រើនទៀត ដែលត្រូវធ្វើឲ្យហើយនិងរៀបចំសម្រាប់ថ្ងៃស្អែក។ ពេលមានបុណ្យទានម្តងៗ អ្នកមិនអាចដើរហើរឲ្យស្រលះខ្លួននោះទេ ព្រោះខ្លួនប្រាណនៅកន្លែងដើរលេង ប៉ុន្តែចិត្តបារម្ភនឹកគិតដល់ហាង។

២. ត្រូវការចំណាយច្រើន

ពេលខ្លះអ្នកអាចរងសម្ពាធច្រើន ដោយសារតែរបស់របរក្នុងហាងខូច ត្រូវផ្លាស់ប្តូរកែកុនជាថ្មី្ ហើយត្រូវយកចិត្តទុកដាក់ជាមួយផលិតផល និងរិះរកគំនិតថ្មីៗ សម្រាប់តម្រូវការអតិថិជន។ ប្រសិនបើអ្នកនៅតែធ្វើអ្វីដដែលៗ គ្មានការUpdate នោះដៃគូប្រកួតប្រជែងនឹងអាចផ្ដួលរំលំអ្នកនៅថ្ងៃណាមួយមិនខានឡើយ។

៣. ត្រូវប្រើទាំងកម្លាំងកាយនិងកម្លាំងចិត្ត

អ្នកមានដើមទុនគ្រប់គ្រាន់សម្រាប់បើកហើយ លើសពីនេះទៅទៀតអ្នកក៏ត្រូវមានទាំងកម្លាំងកាយនិងកម្លាំងចិត្តឲ្យបានពេញលេញ ព្រោះអ្នកត្រូវងើបពីព្រលឹមមកបើកហាង ឈររយៈពេលយូរ មានរឿងជាច្រើនត្រូវជួបប្រទះនិងដោះស្រាយជារៀងរាល់ថ្ងៃ។

៤. ទទួលនូវការរិះគន់

អតិថិជនមានចិត្តផ្សេងៗខុសពីគ្នា អ្នកខ្លះចូលចិត្ត ខ្លះទៀតមិនចូលចិត្ត ដូច្នេះអ្នកត្រូវត្រៀមខ្លួនឲ្យបានរួចរាល់ ទទួលនូវការរិះគន់ មតិយោបល់ និងគំនិតផ្សេងៗពីភ្ញៀវ ទោះបីពេលខ្លះអ្នកមិនអាចទទួលយកបាន ប៉ុន្តែអ្នកនៅតែត្រូវទប់អារម្មណ៍សម្របខ្លួនទៅតាមនឹងដែរ។

៥. ជួបបញ្ហាលុយកាក់

មិនប្រាកដថាគ្រាន់តែបើកភ្លាម មានមនុស្សច្រើនកុះករចូលមកនោះទេ ព្រោះបច្ចុប្បន្ននេះហាងកាហ្វេសម្បូររីកដូចផ្សិតអីចឹង អ្នកត្រូវចំណាយពេលយ៉ាងហោចណាស់រាប់ខែទម្រាំមានម៉ូយ និងរាប់ឆ្នាំសម្រាប់ផលចំណេញ ព្រោះអ្នកត្រូវចំណាយលើបុគ្គលិក ទឹកនិងភ្លើង ឬថ្លៃឈ្នួលហាងជាដើម។

៦. ប្រឈមជាមួយនឹងការជួបមនុស្សច្រើនប្រភេទ

អ្នកត្រូវមានទំនាក់ទំនងល្អជាមួយបុគ្គលិក ព្រមទាំងអតិថិជន ហើយអ្នកខ្លះមិនមែនស្រួលនិយាយគ្នាដូចដែលអ្នកគិតនោះទេ។ យ៉ាងណាមិញអតិថិជន ប្រៀបបានដូចជាស្តេច ដូច្នេះវាទាមទារឲ្យអ្នកមានការអត់ធ្មត់ខ្ពស់ មិនថាក្នុងកាលៈទេសៈបែបណានោះទេ។

ចុចអានបន្ត៖