ម្ចាស់ស្នាដៃម៉ូដសម្លៀកបំពាក់ខ្មែរ ២ រូប ប្រតិកម្មបែបណាពេលឃើញ Miss Grand ថៃ ចម្លងឈុតខ្លួន?

2018-07-16 02:43:11
ចំនួនមតិ 0 | ចំនួនចែករំលែក 0

នៅក្នុងកម្មវិធី Miss Grand Thailand 2018 ដែលទើបតែបញ្ចប់កាលពីយប់មិញនេះ មានការកត់សម្គាល់ឃើញ នូវម៉ូដសម្លៀកបំពាក់ប៉ុន្មានម៉ូដដែលបានស្លៀកដោយបវរកញ្ញាថៃនៅក្នុងកម្មវិធីនេះ មានភាពស្រដៀងគ្នាខ្លាំងទៅនឹងស្នាដៃ យុវជនខ្មែរពីររូបដែលបានបង្ហោះនៅក្នុងបណ្តាញសង្គម និងមានការគាំទ្រចូលចិត្តយ៉ាងច្រើន ជាហេតុនាំឲ្យសាធារណៈជន មានប្រតិកម្មនិងយល់ឃើញថា ថៃធ្វើការចម្លងម៉ូដពីខ្មែរ។ យ៉ាងណាមិញដើម្បីស្រាយនូវចម្ងល់ឲ្យបានកាន់តែច្បាស់ កញ្ញាបានធ្វើបទសម្ភាសន៍ជាមួយនឹងលោក ធឿន សុជាតិ និងលោក ថៃ សាន ដែលជាម្ចាស់ស្នាដៃ រូបគំនូរនៃម៉ូដសម្លៀកបំពាក់ទាំងអស់នោះ។

*ចំណាប់អារម្មណ៍របស់លោក ធឿន សុជាតិ

លោក ធឿន សុជាតិ

លោក **ធឿន សុជាតិ** អាយុ២២ឆ្នាំ ជានិស្សិតផ្នែកស្ថាបត្យកម្មគូរប្លង់ នៅសាលាភូមិន្ទវិចិត្រសិល្បៈ។ និស្សិតមួយរូបនេះ បានចំណាយអស់រយៈពេល៥ខែ សម្រាប់ធ្វើការសិក្សាស្រាវជ្រាវពីខេត្តទាំងអស់ នៅក្នុងប្រទេសខ្មែរ ព្រោះម៉ូដសម្លៀកបំពាក់ដែលលោកបានគូរចេញមក សុទ្ធតែតំណាងឲ្យខេត្តនីមួយៗ។ ពាក់ព័ន្ធទៅនឹង ម៉ូដសម្លៀកបំពាក់ នៅក្នុងកម្មវិធី Miss Grand Thailand 2018 លោកបាននិយាយ បង្ហាញចំណាប់អារម្មណ៍ថា ម៉ូដទាំងអស់នោះបើមើលមួយភ្លែត គឺស្រដៀងគ្នា៥០ភាគរយទៅនឹងស្នាដៃរបស់ខ្លួន គ្រាន់តែយើងមិនអាចចោទគេទាំងស្រុងបាននោះទេ ដោយហេតុថារវាងប្រទេសខ្មែរនិងថៃគឺមានប្រពៃណីវប្បធម៌ស្រដៀងគ្នា ដូច្នេះវាក៏អាចជះឥទ្ធិពលដល់ការច្នៃម៉ូឌផងដែរ។ យ៉ាងណាមិញ ការសន្និដ្ឋានមួយទៀតរបស់សុជាតិ បានបញ្ជាក់បន្តថា មានម៉ូដខ្លះពិតជាចម្លងមែន គ្រាន់តែពួកគេបានធ្វើការច្នៃប្រឌិត កែតម្រូវបន្ថែម ប្រើសាច់ក្រណាត់ប្រភេទថ្មី ប៉ុន្តែនៅក្នុងផ្នត់គំនិតតែមួយ។ ជាក់ស្តែងដូចជាម៉ូដមួយនេះដែរ លោកបានធ្វើការសិក្សាស្រាវជ្រាវនិងគូរចេញឡើងតំណាងឲ្យខេត្តបាត់ដំបង ដោយមានកាន់កួរស្រូវនិងកណ្ដៀវ ចំណែកឯម៉ូដដែលថៃបានស្លៀកវិញ គឺដូចទាំងកអាវនិងផ្នត់គំនិត។

*ចំណាប់អារម្មណ៍របស់លោក ថៃ សាន

លោក ថៃ សាន

លោក ថៃ សាន អាយុ៣៨ឆ្នាំ ដែលជាវិចិត្រករគំនូរ និងជាបុគ្គិកបម្រើការងារនៅអង្គការគ្រួសារថ្មី តែងតែខំប្រឹងធ្វើការច្នៃម៉ូតខ្មែរផ្សេងៗ ទទួលបានការគាំទ្រជាច្រើន ក៏មានគំនិតមិនខុសពី លោក ធឿន សុជាតិ ប៉ុន្មានដែរ។ ទោះបីជាមិនអាចចោទគេបានទាំងស្រុងក៏ពិតមែន ប៉ុន្តែលោកអាចសន្និដ្ឋានបានថា ម៉ូដទាំងនោះគឺមានការចម្លងខ្លះៗ និងច្នៃថែមបន្តិចបន្តួច មើលទៅដូចសឹងតែ៥០% ពីម៉ូដដែលលោកធ្លាប់បានគូរនិងបង្ហោះតាំងពីឆ្នាំមុនមកម្ល៉េះ ហើយឈុតទាំងអស់គឺសុទ្ធតែដកស្រង់ចេញពីទំនៀមទម្លាប់វប្បធម៌ខ្មែរ ដូចជាស្បែកធំ ខ្លែងឯកជាដើម បង្កើតឡើងក្នុងគោលបំណងដើម្បីបំផុសគំនិតកូនខ្មែរឲ្យមានការគាំទ្រលើកស្ទួយ និងដើម្បីបង្ហាញគំនិតថ្មីប្លែកៗនៅលើឆាកអន្តរជាតិ។ លោកថៃ សាន វិចិត្រករដ៏មានទេពកោសល្យរូបនេះ បានបន្តទៀតថា ពេលខ្លះលោកក៏មានការអាក់អន់ស្រពន់ចិត្តខ្លះដែរ នៅពេលបានឃើញ អ្នកសិល្បៈមួយចំនួនមិនថាតែនៅក្រៅប្រទេសនោះទេ សូម្បីតែនៅក្នុងស្រុក គឺបានលួចយកស្នាដៃរបស់លោក ដោយពុំឆ្លងកាត់ការអនុញ្ញាតជាមុន។ នេះបង្ហាញថា ពួកគេខ្វះសុជីវធម៌ និងមិនមានការឲ្យតម្លៃទៅលើស្នាដៃរបស់លោកនោះទេ។

សរុបជារួមមក យុវជនដែលពោរពេញទៅដោយសមត្ថភាពទាំងពីររូបនេះ ពិតជាមានបំណងចង់ឲ្យស្នាដៃរបស់ខ្លួន លេចចេញជារូបរាងពិតៗយ៉ាងខ្លាំងក្រៃលែង ប៉ុន្តែដោយសារតែខ្វះការឧបត្ថម្ភលើកស្ទួយ ជួយជ្រោមជ្រែង និងត្រូវការចំណាយថវិកាច្រើន ដូច្នោះហើយទើបធ្វើឲ្យស្នាដៃរបស់អ្នកទាំងពីរ បានត្រឹមកប់នៅក្នុងរូបគំនូរ គ្មានឱកាសបានបង្ហាញចេញមកខាងក្រៅ ដូចជាប្រទេសដទៃទៀតដែលមានការឲ្យតម្លៃ និងស្ញប់ស្ញែងទៅលើនរណាដែលមានទេពកោសល្យបែបនេះណាស់។