គួរឲ្យសរសើរ! យុវតីខ្មែរមានមហិច្ឆតាខ្ពស់ ពីតារាបង្ហាញម៉ូដក្លាយជាម្ចាស់សិប្បកម្មផលិតផលធម្មជាតិ

2018-09-02 20:57:23
ចំនួនមតិ 0 | ចំនួនចែករំលែក 0

យុវតីខ្មែរវ័យ២៥ឆ្នាំមួយរូបដែលមានឈ្មោះថា វត្ថា វិច្ឆិកា មិនត្រឹមតែជាតារាបង្ហាញម៉ូដអាជីពសម្រាប់ទស្សនាវដ្ដីក្នុងស្រុកនិងក្រៅស្រុកប៉ុណ្ណោះទេ នាងថែមទាំងមានគំនិតច្នៃប្រឌិតបង្កើតផលិតផលធម្មជាតិ រហូតក្លាយជាម្ចាស់សិប្បកម្មផងដែរ។

វត្ថា វិច្ឆិកា

ថ្វីត្បិតតែ **វិច្ឆិកា** រៀនមិនបានខ្ពង់ខ្ពស់ពិតមែន ប៉ុន្តែមហិច្ឆតារបស់នាងគឺមិនទាបឡើយ។ មូលហេតុដែលនារីស្រអែមស្រស់មួយរូបនេះមានគំនិតបង្កើតប្រេងដូងធម្មជាតិ ដោយសារតែក្នុងអំឡុងពេលទៅថតរូបបង្ហាញម៉ូដនៅតាមខេត្ត អ្នកផាត់មុខបានយកប្រេងដូងមកជូតសម្អាតគ្រឿងសម្អាងនៅលើមុខរបស់នាង ហើយឃើញថាវាមានអត្ថប្រយោជន៍ជាច្រើនសម្រាប់ស្បែក ទើបធ្វើឲ្យនាងចាប់ដៃគូសហការជាមួយបរទេសមួយក្រុម នៅក្នុងឆ្នាំ២០១៤។ រហូតមកដល់ឆ្នាំ២០១៧ **វិច្ឆិកា** បានបើកសិប្បកម្មផ្ទាល់ខ្លួនមានឈ្មោះថា **"ដៃខ្មែរ”** ដែលមានផលិតផលសម្រាប់ថែរក្សាសម្ផស្សជាច្រើនប្រភេទខុសៗគ្នា។

វិច្ឆិកា បានបញ្ជាក់មកកាន់វេបសាយ កញ្ញា ថា "រាល់ផលិតផលទាំងអស់ គឺសុទ្ធតែ សម្រិតសម្រាំងចេញពីធម្មជាតិពិតៗ មិនភូតភរកុហក ដើម្បីអាចធានាពីគុណភាពយ៉ាងពេញលេញសម្រាប់អ្នកប្រើប្រាស់។" មកទល់នឹងពេលនេះ ក្រៅពីការចម្រាញ់ប្រេងដូង និងការផលិតសាប៊ូចេញប្រេងដូង សិប្បកម្ម "ដៃខ្មែរ" ក៏បានបង្កើត ម្សៅធ្យូងត្រឡោកដូង សម្រាប់ដុសធ្មេញឲ្យស និងអាចធ្វើជាស្រ្កាប់ខាត់មុខ ព្រមទាំងសាប៊ូដុសខ្លួន៦ប្រភេទផ្សេងទៀត។

គម្រោងនាពេលអនាគតរបស់ម្ចាស់សិប្បកម្មវ័យក្មេងរូបនេះ គឺចង់ច្នៃប្រេងដូងទៅជាសាប៊ូកក់សក់បន្ថែមទៀត ហើយមានការដាក់លក់នៅតាមបណ្តាផ្សារទំនើបធំៗ និងការនាំចេញទៅក្រៅប្រទេសផងដែរ ៕