ធ្លាប់ជាជនរងគ្រោះព្រោះជំងឺធ្លាក់ទឹកចិត្ត Nikki Nikki ប្រាប់វិធីធ្វើឱ្យខ្លួនរស់ឡើងវិញ

2018-09-14 18:56:00
ចំនួនមតិ 0 | ចំនួនចែករំលែក 0

រម្លឹកដល់ការចូលរួមក្នុងកម្មវិធីមួយពាក់ព័ន្ធនឹងជំងឺធ្លាក់ទឹកចិត្តកាលពីប៉ុន្មានខែកន្លងទៅ Nikki Nikki ដែលជាតារាចម្រៀង POP និងជាអ្នកនិពន្ធបទចម្រៀងថ្មីផ្ទាល់ខ្លួន បានចែករំលែកបទពិសោធន៍ជីវិតពិតដែលធ្លាប់ក្លាយជាជនរងគ្រោះព្រោះតែជំងឺធ្លាក់ទឹកចិត្តនេះ។

រូបថតពីហ្វេសប៊ុក Nikki Nikki ថតដោយ Ah Sva Media

Nikki Nikki មានឈ្មោះពិត សុជាតា បានរៀបរាប់ថា នាងបានកើតជំងឺធ្លាក់ទឹកចិត្តតាំងពីឆ្នាំ២០១៣មក។ ស្ថិតក្នុងស្ថានភាពធ្លាក់ទឹកចិត្ត នាងបានក្លាយជាមនុស្សដែលលែងសូវមាត់ក ស្រងូតស្រងាត់ ចាក់សោខ្លួនឯងក្នុងបន្ទប់រាល់ថ្ងៃ និងលែងចង់ញ៉ាំអី ហើយគីឡូក៏ធ្លាក់ខ្លាំង នៅសល់ត្រឹម៣០ទៅ៣៥គីឡូ។

ម្ចាស់បទ Home For Dinner ដែលនិពន្ធបទនេះឡើងព្រោះតែរឿងធ្លាក់ទឹកចិត្តនេះផង បានប្រាប់បន្តថា "ពេលនោះខ្ញុំយំច្រើន មានរឿងអីឆាប់ប៉ះពាល់ផ្លូវចិត្ត ហើយពេលយើងយំយូរ យំខ្លាំង វាធ្វើឱ្យឈឺភ្នែក ឈឺក្បាល ខ្សោះជាតិទឹកក្នុងខ្លួន និយាយទៅធ្វើឱ្យយើងពិបាកក្នុងខ្លួន។"

ចុចអាន៖ កុំឲ្យមានជំងឺបាក់ទឹកចិត្តទាំងអត់ដឹងខ្លួន អ្នកត្រូវសង្កេតខ្លួនឯងតាមចំណុចទាំងនេះ

រូបថតពីហ្វេសប៊ុក Nikki Nikki ថតដោយ SNAPP

Nikki Nikki បន្ថែមទៀតថា ពេលកើតជំងឺនេះដំបូង នាងបានធ្វើអ្វីៗដើម្បីឱ្យខ្លួនសប្បាយឡើងវិញ ដូចជាទៅក្លឹប រាំ ផឹក និងដល់ថ្នាក់ជក់ទៀត គ្រាន់តែជក់ក្នុងរយៈខ្លីក៏ផ្ដាច់វិញ។ ប៉ុន្តែអ្វីៗទាំងនេះមិនបានជួយដោះស្រាយឱ្យនាងធូរស្បើយឡើងវិញទេ។ "ពេលហ្នឹងគឺយើងចេះតែសាកល្បងអីគ្រប់បែបយ៉ាង។ យើងគិតថាយើងអាចគេចចេញពីជំងឺហ្នឹងបាន បើសិនជាយើងសប្បាយ តែការពិត ខ្ញុំគិតខុស"។

តារាចម្រៀងបទ Original រូបនេះក៏ធ្លាប់ឈានទៅដល់ការចង់សម្លាប់ខ្លួន ព្រោះតែអ្វីៗនៅតែដោះស្រាយមិនបាន តែដល់ចំណុចមួយ នាងក៏គិតថាត្រូវតែជួយខ្លួនឯង ហើយក៏បានចែករំលែកវិធីសាស្ត្រដើម្បីឱ្យខ្លួនរស់ឡើងវិញដូចសព្វថ្ងៃដូចជា៖

រៀបចំគម្រោងសម្រាប់ខ្លួនឯង និងត្រលប់ទៅក្រុមគ្រួសារវិញ
ចែករំលែករឿងរ៉ាវជាមួយមិត្តភ័ក្ដិ និងចេញទៅដើរលេងជាមួយមិត្តភ័ក្ដិ ឬក្រុមគ្រួសារ
ហាត់ប្រាណ ធ្វើម្ហូប លាងចាន ឬធ្វើអ្វីឱ្យខ្លួនឯងរវល់
ព្យាយាមទប់អារម្មណ៍ខ្លួនឯង ហើយយំតែមួយពេលបានហើយ
ព្យាយាមស្ដាប់ចម្រៀងណាសប្បាយៗ កុំស្ដាប់បទកម្សត់ ឬកើតទុក្ខ
កុំសម្រេចចិត្ត ឬវាយតម្លៃអ្វីលឿនពេក ពេលកំពុងពិបាកចិត្ត ឬកំពុងខឹង
កុំដាក់សម្ពាធលើខ្លួនឯងពេក ត្រូវប្រាប់ខ្លួនណាថា "នរណាក៏ធ្លាប់បរាជ័យដែរ មិនមែនតែយើងម្នាក់ទេ"
កុំយកចិត្តទុកដាក់លើមនុស្សដែលស្អប់យើង ត្រូវឱ្យតម្លៃលើជីវិតខ្លួនឯងឱ្យបានច្រើន។

រូបថតពីហ្វេសប៊ុក Nikki Nikki ថតដោយ SNAPP

តាមរយៈអ្វីដែល Nikki Nikki បានឆ្លងកាត់ និងចែករំលែកនេះ សង្ឃឹមថាអ្នកកំពុងជួបរឿងបាក់ទឹកចិត្ត ឬដឹងថាខ្លួនឯងកំពុងធ្លាក់ទឹកចិត្តអាចពិចារណា និងរៀនសូត្រតាមចំណុចខាងលើនេះ៕

ចុចអាន៖ ទម្លាប់ ៦យ៉ាងជួយអ្នកយកឈ្នះជំងឺបាក់ទឹកចិត្ត ហើយត្រឡប់មានជីវិតល្អឡើងវិញ

អត្ថបទ៖ សរ សុគន្ធី