ក្រោយលែងលះគ្នាសេដ្ឋីអាមេរិកឲ្យប្រពន្ធ ១,៣ពាន់លានដុល្លារ តែដណ្ដើមសិទ្ធិចិញ្ចឹមឆ្មា

2019-02-27 22:00:00
ចំនួនមតិ 0 | ចំនួនចែករំលែក 0

អ្នកជំនួញ Bill Gross ស្ម័គ្រចិត្តចែករំលែកទ្រព្យសម្បត្តិពាក់កណ្ដាល ប៉ុន្តែបានដណ្ដើមសិទ្ធិចិញ្ចឹមឆ្មាបីក្បាលជាមួយប្រពន្ធ។

លោក Bill Gross និងភរិយា កាលនៅជុំគ្នា

យោងតាមបណ្ដាញព័ត៌មាន Forbes មុនពេលលែងលះ មហាសេដ្ឋី Bill Gross វ័យ៧៤ឆ្នាំ ដែលជាស្ថាបនិកក្រុមហ៊ុន PIMCO ធ្លាប់មានទ្រព្យសម្បត្តិ ២,៥ពាន់លានដុល្លារ។ ក្រោយពេលលែងលះប្រពន្ធក្នុងឆ្នាំ ២០១៧ ទ្រព្យសម្បត្តិលោកនៅសល់ ១,៥ពាន់លានដុល្លារ រីឯអតីតភរិយារបស់លោក លោកស្រី Sue Gross វ័យ ៦៨ ឆ្នាំ មានទ្រព្យសម្បត្តិ ១,៣ ពាន់លានដុល្លារ។

ក្រោយពេលរួមរស់ជាមួយគ្នា ៣២ ឆ្នាំ លោកស្រី Sue បានដាក់ពាក្យបណ្ដឹងលែងលះប្ដី ដោយលើកមូលហេតុថា អ្នកទាំង២មានគំនិតខុសគ្នាដែលមិនអាចផ្សះផ្សារបាន។ ក្រោយដាក់ពាក្យលែងលះ លោកស្រីបានរើចេញពីភូមិគ្រឹះដែលអ្នកទាំង២ធ្លាប់រស់នៅជាមួយគ្នា។

រូបឆ្មាតំណាង

ទោះបីជាមានទ្រព្យសម្បត្តិច្រើនមែន តែការលែងលះរបស់អ្នកទាំង២ត្រូវប្រព្រឹត្តទៅយ៉ាងរលូន ដោយខាងប្ដីបានសុខចិត្តចែកទ្រព្យសម្បត្តិឲ្យប្រពន្ធពាក់កណ្ដាល។ ជម្លោះតែមួយគត់របស់មហាសេដ្ឋីនោះគឺ សិទ្ធិចិញ្ចឹមឆ្មាទាំង៣ របស់អ្នកទាំង២។ តាមនោះដែរ លោកស្រី Sue បានលើកហេតុផលថា អតីតស្វាមីខ្លួនចិញ្ចឹមឆ្មាដោយក្ដៅក្រហាយ ងាយធ្វើឲ្យវាស្លាប់។ ចុងបញ្ចប់លោកស្រីបានទទួលសិទ្ធិចិញ្ចឹមឆ្មា ឯប្ដីវិញមានត្រឹមសិទ្ធិមកមើលតាមត្រីមាសប៉ុណ្ណោះ៕