អត្ថន័យនិមិត្តសញ្ញាពេញនិយមខ្លះៗទាក់ទងនឹងដើមឈើ តា Santa កណ្តឹងមាសក្នុងបុណ្យណូអែល

2019-12-16 00:55:00
ចំនួនមតិ 0 | ចំនួនចែករំលែក 0

និយាយពីបុណ្យណូអែលវិញ តើធ្លាប់គិតទេថា ហេតុអ្វីក៏គេតែងលើកឡើងពីលោកតា Santa ស្លៀកខោអាវក្រហម ស្ពាយថង់អំណោយធំជាប់ខ្លួន រួមទាំងដើមឈើណូអែលធំថែមទៀត។តើអ្នកធ្លាប់ឆ្ងល់ឬទេ? ហេតុអីក៏ដើមណូអែល ត្រូវតុបតែងនិងព្យួរគ្រឿងតុបតែងដូចជា ផ្កាយ កណ្តឹង ស្រោមជើងនិងបាល់ជាដើម? តោះ ថ្ងៃនេះកញ្ញា នឹងស្រាយចម្ងល់។

១. កម្រងផ្កាស្លឹកឈើ

រូបតំណាង

ជាកម្រងផ្កាដ៏ពេញនិយមមួយក្នុងពិធីបុណ្យប្រពៃណី ព្រមទាំងបុណ្យណូអែលផងដែរ ដែលចងភ្ជាប់ខ្សែបូពណ៌ក្រហម បង្ហាញពីភាពអំណរ។ ចំពោះស្លឹកឈើពណ៌បៃតងវិញ តំណាងឲ្យជីវិតជានិរន្ត ដែលបង្ហាញលើជំនឿនៃកំណើតព្រះយេស៊ូ។ ដូច្នេះកម្រងផ្កានេះ គេមានជំនឿថាអាចការពារផ្ទះពីធាតុអាក្រក់ បណ្ដេញចំហាយមិនល្អឲ្យទៅឆ្ងាយ កុំឲ្យឆ្លងចូលឆ្នាំថ្មី។

២. ស្លឹកឈើ

រូបតំណាង

ស្លឹកឈើពណ៌បៃតងស្រងាត់ ជានិមិត្តសញ្ញានៃជីវិត ។ ស្លឹកឈើដ៏បរិសុទ្ធនេះមានទំនាក់ទំនងនឹងព្រះយេស៊ូ ដែលផ្លែឈើពណ៌ក្រហមនៃដើមឈើ Holly នេះ តំណាងឲ្យតំណក់ឈាមរបស់ព្រះយេស៊ូនៅលើឈើឆ្កាង។ ម្យ៉ាងទៀត ក៏បង្ហាញពីក្ដីស្រលាញ់ផងដែរ។ រីឯបន្លាស្លឹកឈើវិញ ជានិមិត្តរូបបង្ហាញពីការរំលឹកដល់មកុដនៃបន្លាដែលទាហានរ៉ូម៉ាំង បានដាក់នៅលើក្បាលរបស់ព្រះយេស៊ូ។

៣. រូបកណ្ដឹង

រូបតំណាង

នៅពេលព្រឹកនៃថ្ងៃបុណ្យណូអែល សំលេងកណ្តឹងបន្លឺឡើងដើម្បីអបអរថ្ងៃកំណើតរបស់ព្រះយេស៊ូ។ យោងតាមរឿងនិទាន សំលេងកណ្តឹងត្រូវបានគេបន្ទរឡើងជាច្រើនម៉ោងនៅថ្ងៃបុណ្យណូអែលចូលមកដល់ ដើម្បីជាសញ្ញាបំបាត់ភាពខ្មៅងងឹត មុនពេលព្រះប្រសូត។ ហើយនៅពាក់កណ្តាលអាធ្រាត្រ សំលេងកណ្តឹងនោះត្រូវគេចាត់ទុកជាសំលេងនាំមកនូវសុភមង្គល។

៤. ផ្កាយពណ៌មាស

រូបតំណាង

សម្រាប់គ្រិស្តសាសនិក គេចាត់ទុកផ្កាយនេះជាអារម្មណ៍ពិសេសរបស់ព្រះយេស៊ូដែលបង្ហាញមករកភពផែនដី។ ជាទូទៅ ផ្កាយនេះតែងរះចិញ្ចាចនៅពេលព្រឹកព្រលឹម។ វាមានអត្ថន័យណាស់សម្រាប់ពួកគេ ហើយពួកគេបានចាត់ទុកថាជាការបែងចែកជាមួយមេឃដោយមិនគិតពីជញ្ជាំងអ្វីដែលរារាំងផ្ទៃផែនដី។

៥. គ្រឿងតុបតែង និងផ្លែប៉ោម

រូបតំណាង

នៅតាមផ្ទះមួយចំនួន គេយកផ្លែប៉ោមធ្វើជាគ្រឿងតុបតែងលើដើមឈើ ដែលមើលទៅដូចជាដើមឈើនៃជីវិតទៅស្ថានសួគិ៍។ ចំណែកគ្រឿងអលង្ការតុបតែងតូចៗវិញ គេជឿថាវាមានពន្លឺភ្លឺផ្លេកៗ ដែលផ្តល់ការកម្សាន្តដល់មនុស្សគ្រប់គ្នានៅក្នុងផ្ទះ។ ម្ល៉ោះហើយទើបគេតែងតែបន្ថែមទៀន និងអំពូលនៅលើតុ ដើម្បីឲ្យចែងចាំងជាមួយគ្រឿងតុបតែងទាំងនេះ។

៦. ស្រោមជើង

រូបតំណាង

តាមព្រេងនិទាន ដំណាលថាលោកតាម្នាក់ឈ្មោះ Saint Nicholas បានជួបក្មេងស្រីក្រីក្រ៣នាក់ជាបងប្អូននឹងគ្នារស់នៅជនបទ ហើយពួកគេជាទាសករ។ ដើម្បីជួយពួកគេ លោកតា Saint ក៏បានទម្លាក់កាក់មាសចូលទៅក្នុងបំពង់បង្ហុយផ្សែងក្នុងផ្ទះរបស់ពួកគេ។ យប់នោះ កាក់មិនបានធ្លាក់ចុះមកដូចការគិតឡើយ ប៉ុន្តែបែរជាធ្លាក់ទើរក្នុងស្រោមជើងដែលក្មេងស្រីទាំងបីបានព្យួរនៅមុខភ្នក់ភ្លើងមុខបំពង់បង្ហុយផ្សែងទៅវិញ។ ពេលព្រឹកឡើង ក្មេងស្រីទាំង៣ យកស្រោមជើងមកពាក់ក៏ឃើញកាក់មាសទាំងនោះ ធ្វើឲ្យពួកគេសប្បាយចិត្តយ៉ាងខ្លាំង។ ដោយសារតែបែបនេះហើយ មនុស្សជាច្រើនបានព្យូរស្រោមជើងបុណ្យណូអែលរបស់ពួកគេដែរ ជាមួយក្តីសង្ឃឹមថា នឹងទទួលបានកាដូ។

រូបតំណាង

សម្រាប់ពណ៌ដែលគេប្រើប្រាស់ក្នុងរដូវកាលបុណ្យណូអែលវិញ ខុសៗគ្នា។ ដូចជា ពណ៌ក្រហមរបស់លោកតា Santa ពណ៌បៃតងនៃដើមឈើ ពណ៌មាសរបស់ពន្លឺផ្កាយនិងទៀន រួមទាំងពណ៌សរបស់ព្រិលទឹកកកផងដែរ។

ពណ៌ក្រហម៖ ជាពណ៌ដែលបង្ហាញពីក្តីរំភើបនៃខែធ្នូ ។ បើយោងតាមសាសនា តំណាងឲ្យភ្លើង ឈាម និងភាពបរិបូរណ៍។

ពណ៌បៃតង៖ និមិត្តសញ្ញានៃធម្មជាតិ យុវជននិងក្តីសង្ឃឹមរបស់ជីវិត។ សម្រាប់ពណ៍នេះក្នុងបុណ្យណូអែលវិញ គេចាត់ទុកជាពណ៍នៃក្តីសង្ឃឹម។ ពណ៌ស៖ តំណាងឲ្យភាពខុសៗគ្នាដូចជា ពន្លឺ ភាពបរិសុទ្ធ សុភមង្គល និងភាពរុងរឿង។ ជាញឹកញាប់គេឃើញពណ៍សច្រើនមានលើពុកមាត់ដ៏វែងរបស់តា Santa មនុស្សទឹកកក និងដុំព្រិលជាដើម។

ពណ៌មាស៖ តំណាងឲ្យពន្លឺព្រះអាទិត្យនិងការរះចិញ្ចាច ហើយវាក៏តំណាងឲ្យពណ៍របស់បុណ្យណូអែលគឺផ្កាយ ភ្លើងទៀន គ្រឿងលម្អ និងអំពូលផងដែរ៕