អាយុសាមសិប សែសិប តែមិនទាន់ជោគជ័យ គឺមកពីហេតុផលតែមួយគត់

2020-07-20 08:00:00
ចំនួនមតិ 0 | ចំនួនចែករំលែក 0

នៅវ័យក្មេង គឺជាពេលដែលគេបើកសិទ្ធិឲ្យយើងពើបប្រទះនូវកំហុសនានា។ កុំរត់គេចពីកំហុស តែត្រូវរកវិធីផ្លាស់ប្ដូរវា។ បើមិនដូចនោះទេ រហូតដល់ចាស់ អ្នកនៅតែនៅមួយកន្លែង មិនទៅណារួច។

មូលហេតុចម្បង នៃការមិនជោគជ័យរបស់មនុស្សភាគច្រើននោះគឺ ពូកែយកលេសមកបាំងនូវកំហុសរបស់ខ្លួន។ កំពូលមហាសេដ្ឋី Bill Gates ធ្លាប់និយាយថា៖ ប្រសិនបើអ្នកមិនអាចធ្វើឲ្យបានល្អទេ យ៉ាងហោចណាស់ក៏អ្នកគួរធ្វើឲ្យវាមើលទៅដូចជាល្អដែរ។

មនុស្សជាច្រើននៅពេលធ្វើខុស គេនឹងរកគ្រប់វិធីសាស្ត្រដើម្បីរកលេសបិទបាំងនូវកំហុសរបស់ខ្លួន ដោយសមស្របជាទីបំផុត។ ជាលទ្ធផល គេនឹងនៅទីនោះជារៀងរហូត ទាំងការគិត និងសកម្មភាព បើមិនចង់និយាយថា គេអាចដើរថតក្រោយក៏ថាបាន។ អ្នកដែលពូកែរកលេស ភាគច្រើនមិនពូកែក្នុងការតស៊ូនោះឡើយ។ ពួកគេខ្វះគំនិតច្នៃប្រឌិត និងតែងរកហេតុផលអ្វីមួយ ដើម្បីឲ្យខ្លួនមិនចាំបាច់ធ្វើការងារមួយនោះ ទាំងដែលការពិតគេអាចធ្វើវាបានយ៉ាងងាយស្រួល។

បើអ្នកមិនចង់ អាយុសាម អាយុសែ នៅតែត្រុកៗរកមួយថ្ងៃ គិតមួយថ្ងៃ អ្នកត្រូវផ្លាស់ប្ដូរខ្លួនឯង ព្យាយាមបន្ថែមទៀត។ ហើយឈប់ពន្យារពេលនូវអ្វីដែលត្រូវធ្វើ។ វ័យក្មេងគឺជាវ័យដែលអាចមានកំហុស ព្រោះងាយកែ។ តែបើពេលអាយុជ្រេហើយ កំហុសទាំងនោះ តែងធំជាង និងពិបាកកែជាង។ កុំរកលេសរត់ចេញពីកំហុស តែត្រូវកែកំហុសទាំងនេះ មានតែបែបនេះ ទើបសង្ឃឹមថាជោគជ័យដូចគេ៕

ប្រភព៖ Phunutoday ប្រែសម្រួល៖ Caramel