ពិតអត់ដែលថាស្រីៗយើង ស្រលាញ់តែប្រុសៗរៀនពូកែ?

2017-03-09 21:08:07
ចំនួនមតិ 0 | ចំនួនចែករំលែក 0

ធ្លាប់ឮបុរសៗរអ៊ូថា មនុស្សស្រីៗស្រលាញ់តែប្រុសៗណាដែលរៀនពូកែប៉ុណ្ណោះ។ ចំណែកប្រុសដែលរៀនមិនពូកែ ស្រីៗមិនយកភ្នែកមើលទេ។ ទស្សននេះពិតអត់? ចុះដឹងអត់ថាហេតុអ្វីបាននារីៗស្រលាញ់តែអ្នករៀនពូកែនឹងអត់ អានការបកស្រាយទាំងអស់គ្នា?

កេសី៖ «មិនមែនស្អប់អ្នករៀនខ្សោយអីនោះទេ តែបើយើងរៀនខ្សោយហើយ បានសង្សាររៀនខ្សោយទៀត ចឹងធ្លាក់ទឹកទាំងពីរនាក់នឹង គ្មានពីណាយោងពីណាទេ»។

រូបតំណាង

**សូរិយា**៖ «រឿងនេះពិបាកនិយាយណាស់ ព្រោះមនុស្សប្រុសគឺជាអ្នកតាមស្រលាញ់យើង បើគេគ្មានសមត្ថភាពសូម្បីតែរៀន ផ្ញើអនាគតមិនកើតទេ»។

សុខេម៉ា៖ «មិនមែនស្រីៗទាំងអស់ស្រលាញ់រកតែប្រុសៗរៀនពូកែទេ។ ទោះរៀនមិនពូកែក៏ខ្ញុំស្រលាញ់ដែរ ឲ្យតែឆ្លាតទៅបានហើយ កុំរៀនមិនពូកែហើយមិនឆ្លាតទៀត សមនឹងគ្មានអ្នកស្រលាញ់មែន»។

យូហ៊ុយ៖ «រៀនមិនពូកែក៏មិនអីដែរ ឲ្យតែខិតខំប្រឹងរៀនទៅបានហើយ ខ្ញុំនៅតែស្រលាញ់នឹង។ តែបើរៀនខ្សោយហើយ ហើយមិនប្រឹងរៀនទៀត សុំទោសមិនយកខ្លួនបៀតទេ»។

សុខនី៖ «ចម្ងល់នេះខ្ញុំអាចបកស្រាយបាន។ ខ្ញុំជាសិស្សពូកែតាំងពីរៀនថ្នាក់បឋម,អនុ និងវិទ្យាល័យរហូតមកដល់សាកលវិទ្យាល័យទៀតក៏នៅតែរៀនពូកែ ដូចនេះហើយមិត្តប្រុសខ្ញុំក៏ត្រូវជាសិស្សពូកែដែរ។ បើសួរថាហេុអ្វី ក៏មិនដឹងឆ្លើយយ៉ាងម៉េចឲ្យសមដែរ គ្រាន់តែដឹងថាមើលទៅសក្ដិសមគ្នា»។

រូបតំណាង

ច័ន្ទណារី៖ «មិនប្រាកដថាប្រុសៗរៀនមិនពូកែ គ្មានស្រីស្រលាញ់ទេ គ្រាន់តែអ្នកមកស្រលាញ់នោះជាក្រុមនារីៗដែលមានកម្រិតសិក្សាស្រដៀងៗគ្នាដែរ។ នេះតាមឃើញមិត្តភ័ក្ដិជាច្រើនរបស់ខ្ញុំ ហើយក៏កម្រមានស្រីៗរៀនពូកែមកស្រលាញ់ប្រុសរៀនខ្សោយណាស់»។

ធាវី៖ «ពិតជាកម្រមានស្រីៗរៀនពូកែមកស្រលាញ់ប្រុសរៀនខ្សោយ តែបើប្រុសៗរៀនពូកែមកស្រលាញ់ស្រីៗរៀនខ្សោយមាន ហើយបើស្រីម្នាក់នោះស្អាតខ្លាំងទៀតមិនបាច់និយាយទេ ប្រុសៗរៀនពូកែ ស្អាត កូនអ្នកមានដឹងតែតម្រង់ជួរគ្នាតាម»។

សុខគង់៖ «គ្មានហេតុផលច្បាស់លាស់ដែរនឹង សម្រាប់ខ្ញុំរៀនអត់សូវពូកែដែរនឹង តែខ្ញុំស្រលាញ់តែបុរសជាសិស្សពូកែ ព្រោះពេលយើងមិនចេះអាចសុំពឹងគាត់ឲ្យជួយបង្រៀនបន្ថែម»។

ចុះមិត្តនារីៗដទៃ មានយោបល់មិចដែរ!

អត្ថបទ៖ ទ្រី រ៉ាវី